Tryezë me kandidatët shqiptarë të zgjedhjeve komunale në Gjenevë

Qëllimi i kësaj tryeze të rrumbullakët është ndërgjegjësimi i popullatës shqiptare me të drejtë vote në komunën në të cilën ata jetojnë

Më 23 mars banorët e dyzetepesë komunave të Republikës dhe Kantonit të Gjenevës do të zgjedhin përfaqësuesit e tyre të Këshillit Lokal (asambleve komunale) dhe kryetarët e komunave përkatëse.

Në prag të këtyre zgjedhjeve do të organizohet një tryezë e rrumbullakët me të gjithë kandidatët me origjinë shqiptare. Qëllimi i kësaj tryeze është ndërgjegjësimi i popullatës shqiptare me të drejtë vote në komunën në të cilën ata jetojnë. Pos kësaj, kjo tryezë ka për qëllim edhe afirmimin e kandidatëve shqiptarë në raport me popullatën shqiptare të kantonit të Gjenevës, përcjell albinfo.ch njoftimin e bërë nga zonja Limani Hiler, organizatore e tryezës.

Gjatë kësaj tryeze, kandidatët zyrtarë do të kenë mundësinë të shpalosin qëllimet e tyre të inkuadrimit në politikë dhe synimet për të ardhmen. Tryeza e rrumbullakët më tutje synon edhe frymëzimin e gjeneratave më të reja për rëndësinë e rolit qytetar në vendimet politike që prekin përditshmërinë e tyre.

Gjithashtu, zonja Limani Hiler në cilësinë e organizatores së kësaj ngjarjeje, bashkë me mediumin informativ Albswiss synon afirmimin e kandidatëve shqiptarë tek një publik më i gjerë me qëllim që ata, në këto zgjedhje lokale të jenë sa më shumë të votuar e të jenë në vendin e merituar. Kjo ngjarje do të mbahet të mërkurën më 5 mars, thuhet më tutje në njoftim.

Pritja organizohet nga ora 18:30. Në ora 19:00 fillimi i Tryezës deri në ora 20:00.

Të gjithë pjesëmarrësit luten që të konfirmojnë praninë e tyre përmes sms në këtë numër: 079 607 46 74. Na shkruani emrin, mbiemrin dhe formacionin politik në të cilin jeni të angazhuar.

Për arsye organizative konfirmimin mund ta bëni më së largu deri të martën në ora 16:00. Pasi të marrim sms-in nga ana juaj, ne iu dërgojmë adresën e vendit ku mbahet Tryeza e rrumbullakët. Për të mbuluar shpenzimet organizative pjesëmarrja juaj është e mirëseardhur. Në pritje, ne iu dëshirojmë shumë suksese dhe iu falënderojmë për pjesëmarrjen e juaj.

Sukseset iu takojnë atyre që nuk dorëzohen para sfidave të jetës”, thuhet në fund të njoftimit nga organizatorja, Mirishahe Limani Hiler.

---