U vihet zjarri dy veturave të Komunës së Zveçanit

Dy vetura të Komunës së Zveçanit janë djegur në orët e para të së premtes, përcjell albinfo.ch.

Policia ka thënë se dyshohet për zjarrvënie, ndërsa po punon për ndriçimin e rastit. 

“Sot në mëngjes, rreth orës 01.40 dy vetura, pronë të Komunës së Zveçanit, janë dëmtuar nga zjarri. Dyshohet se kemi të bëjmë me zjarrvënie, ndërsa të lënduar nuk ka. Policia po punon në drejtim të ndriçimit të rastit”, ka thënë zëvendësdrejtori i Policisë për rajonin e veriut, Veton Elshani.

Jo pak herë në veri të vendit janë regjistruar raste kur janë djegur vetura. Këto raste patën nisur që nga fundi i vitit të kaluar, kur disa serbë vendosën t’i konvertonin targat në RKS. Autoritetet e Kosovës patën thënë se po digjen veturat e atyre që po konsiderohen se po bashkëpunojnë me institucionet e vendit.

Në prill, një pjesëtari të policisë kufitare të Kosovës iu dogj vetura në Mitrovicë të Veriut, e në mars u dogjën pronat e dy serbëve në Kosovë – dy prej tyre ishin lokale në pronësi të nënkryetares së Zveçanit, Natasha Tomaniq.

Ndërkaq, më 24 mars u dogj një objekt në pronësi të Nenad Radosavleviqit, drejtor i Drejtorisë për Sport, Rini dhe Kulturë në komunën që funksionon sipas sistemit të Kosovës.