UBS, banka numër një në botë për menaxhim të pasurive

Kjo bankë zvicerane menaxhon me një pasuri prej 1705 miliardë dollarësh. Banka tjetër e Zvicrës, Credit Suisse zë vendin e pestë, me 855 miliardë

Banka më e madhe e Zvicrës, UBS është shpallur sërish si menaxhuesja më e madhe e pasurive në botë. Këtë konstatim e ka bërë një studim i realizuar nga ndërmarrja për hulumtimin e tregut Scorpio Partnership.

Me një pasuri prej 1705 miliardë dollarësh që administrohet nga ajo, banka UBS e ka marrë titullin që më së fundi e kishte Bank of America, e cila administron pasurinë prej “vetëm” 1674 miliardë dollarësh.

Banka tjetër e madhe zvicerane Credit Suisse në këtë konkurrencë ka zënë vendin e pestë në botë, me pasurinë prej 855 miliardë dollarësh që menaxhon.  

Marrë në përgjithësi, në gjithë botën bankat gjatë vitit 2012 kanë menaxhuar 18.5 bilionë dollarë për klientët e tyre të pasur, që është për 9 për qind me shumë se në vitin 2011.

Te bankat më të mëdha, të cilat bëjnë menaxhimin e tri të katërtave të gjithë kësaj pasurie, rritja gjatë një viti ka qenë 11 për qind.