Ulje mbi 30% e kërkesave të azilit gjatë vitit 2017

Gjatë vitit që kemi lënë pas, azilk në Zvicër kanë kërkuar 18.088 persona, numër ky që është për më shumë se një të tretën më i vogël se ai i një viti më parë

Keystone

Bilanci vjetor i azilkërkimit në Zvicër për vitin 2017 tregon se ka vazhduar trendi i uljes në këtë fushë. Kështu, gjatë vitit që kemi lënë pas, azilk në Zvicër kanë kërkuar 18.088 persona, numër ky që është për më shumë se një të tretën më i vogël se ai i një viti më parë, thuhet në një komunikatë të Sekretariatit Shtetëror për migracion (SEM).

Gjithnjë sipas SEM, kjo ulje shpjegohet nga dy rrethana. E para: në vitin paraprak (2016) numri i azilkërkuesve karakterizohej nga kalimi transit nëpër Zvicër i refugjatëve nga Afganistani, Siria dhe Iraku, të cilët paraqiteshin në Zvicër por vazhdonin më tutje, kryesisht drejt Gjermanisë. Por gjatë vitit 2017 ky fenomen në pjesën më të madhe nuk ka ndodhur më. Shkaku i dytë i rënies është zvogëlimi i migracionit përmes Mesdheut qendror, shkruan albinfo.ch. Ky fenomen ka sjellë një ulje të theksuar të kërkesave për azil nga shtetet afrikane të Subsaharasë.

Edhe në vitin 2017 numri më i madh i kërkuesve të azilit ose 3375 sish, kanë ardhur nga Eritrea. Ata janë në vendin e parë të listës përkundër faktit se ka një rënie prej 34.8% të numrit të tyre në krahasim me një vit më parë. Vendet tjera nga të cilat ka numër të theksuar azilkërkuesish janë: Siria, me 1951 sish ose 9% më pak se në vitin 2016 dhe Afganistani me 1217 (minus 62.3%). Ndërsa është simptomatike rritja e madhe e numrit të azilkërkuesve nga Turqia, shkruan albinfo.ch. Me 852 sish, kemi një shtim prej 62 për qind në krahasim me vitin 2016.

Ndërsa rënie të theksuar kanë pësuar numrat e azilkërkuesve nga Somalia (843 sish ose minus 46.7%) dhe Sri Lanka (840 gjegjësisht 38.8% më pak).