Unioni i Bashkësive Islame Shqiptare në Zvicër uron Kurban Bajramin

Keystone

Unioni i Bashkësive Islame Shqiptare në Zvicër, në emër timin dhe të besimtarëve muslimanë shqiptarë në Zvicër, ua uroj festën e madhe të Kurban-Bajramit.

Festa e Kurban-Bajramit na kujton pejgamberin e Zotit, Ibrahimin a.s., i cili konsiderohet si profeti qendror i feve monoteiste, por që botën nuk e shikonte nga perspektiva e forcës, imponimit dhe dominimit, por nga ajo e zemërgjerësisë, ngrohtësisë shpirtërore, tolerancës, drejtësisë dhe dashurisë.

Po ashtu, kjo festë e madhe ndërlidhet ngushtë edhe me kryerjen e Haxhit, i cili për këtë vit, për shkak të pandemisë Covid-19, organizohet në një formë ndryshe nga sa jemi mësuar me dekada ta shohim. Pavarësisht kësaj gjendjeje, besimtarët mund të nxjerrin mësime dhe porosi të shumta nga mesazhet dhe simbolika e veprimeve të këtij ibade të madh të Haxhit.

Motra dhe vëllezër të shtrenjtë! Duke i shfrytëzuar mirësitë e ditëve festive të Kurban-Bajramit, tekbiret që këndohen, kurbanët që theren, vizitat që i bëjmë te familjarët dhe miqtë, si dhe veprat e mira të tjera që i bëjmë, le të orvatemi ta ndryshojmë vetveten për të mirë dhe të pastrohemi nga çdo veti e keqe dhe negative.

Le t’i festojmë dhe t’i shënojmë këto ditë bajrami në mënyrë të dinjitetshme, duke mos harruar as ata që kanë nevojë për ndihmën tonë: jetimët, skamnorët dhe të sëmurët. Në therjen e kurbanëve ta ndjekim Ibrahimin a.s., duke i gostitur me to familjet, fqinjët dhe nevojtarët. Lusim Zotin e Plotfuqishëm që t‘ju dhurojë mirësi, paqe dhe dashuri! Amin.

Urime dhe me fat festa e Kurban Bajramit!

Mehas Alija
Kryetar i UBISHZ