Vdes 18-vjeçari shqiptar, 11 ditë pas aksidentit në punë

Aksidenti ka ndodhur më 20 maj ndërsa natën e së dielës, më 31 maj, i riu ka vdekur në spital

Një djalë 18-vjeçar, shtetas zviceran me prejardhje kosovare, ishte bllokuar nga një makinë e rëndë shtypëse dhe ishte plagosur rëndë ndërsa punonte në një kompani në Herzogenbuchsee, shkruajnë mediat zvicerane.

Aksidenti ka ndodhur më 20 maj, ndërsa natën e së dielës, më 31 maj, i riu ka vdekur në spital, transmeton albinfo.ch. Rrethanat e aksidentit janë duke u hetuar, shkruajnë mediat zvicerane.

Pas kujdesit fillestar mjekësor, të ofruar nga një ekip i ambulancës, ai ishte dërguar në spital me një helikopter Rega, në gjendje kritike.

Atje, 18-vjeçari, pas 11 ditëve, u është nënshtruar pasojave të plagëve të tij të rënda natën e 31 majit.

Albinfo.ch merr vesh nga burimet e saj se i ndjeri është Albin D., me prejardhje nga Sllatina e Vitisë. Ai ishte në vitin e tretë të shkollës së zanatit për punë në mullinj. Ka qenë pikërisht presa e makinës në mulli që e ka kapur atë dhe i ka shkaktuar lëndime të rënda.

Hetimet po rrjedhin nën drejtimin e Prokurorisë Rajonale Emmental-Oberaargau dhe Policia Kantonale.

(Foto: Ilustrim)

---