Vdes David Bowie

Ai ishte njëri ndër këngëtarët dhe muzicientët me ndikim më të madh në muzikën e popullarizuar të disa dekadave të fundit në botë

Këngëtari dhe muzicienti me influencë të madhe në skenën muzikore të botës, producenti dhe aktori britanik David Bowie ka vdekur në orët e hershme të së hënës, 11 janar, në moshën 69 vjeçare. Ai i është dorëzuar kështu sëmundjes së rëndë të kancerit, të cilën ia kishin konstatuar 18 muaj më parë.

Më 8 janar Bowie kishte pasur ditëlindjen e 69-të dhe me atë rast, ai kishte publikuar albumin e tij të fundit, «Blackstar».

Gjatë karrierës së tij të gjatë, Bowie ka shitur më shumë se 140 milionë pllaka.

Për vdekjen e tij kanë shprehur dhembje, krahas miliona adhuruesve të tij në gjithë botën, edhe kolegët këngëtarë si dhe politikanë.

Kështu kryeministri britanik David Cameron ka shkruar në twitter-in e tij: «Unë e kam degjuar dhe shikuar gjeniun e popit gjatë fazës së rritjes sime. Ai ka qenë një mjeshtër i gjetjeve të reja, dhe gjithmonë e ka qëlluar të duhurën. Një humbje kolosale».

David Bowie ka pasur dhe ka edhe në mesin e shqiptarëve një numër të madh adhuruesish.

Disa nga bendet më të mira të rok dhe pop muzikës në Kosovë, si «Gjurmët», «Asgjë sikur dielli», «Cute Babulja» etj. bartin influencën e dukshme të muzikës së gjeniut Bowie.