Vendet evropiane që prijnë me përdorimin e antibiotikëve

Përdorimi i antibiotikëve ndryshon ndjeshëm nga një vend evropian në tjetrin dhe në disa shtete madje është në rritje, pavarësisht paralajmërimeve të vazhdueshme nga ekspertët e shëndetit për rrezikun e rezistencës ndaj ilaçeve.

Specialistët u bëjnë thirrje vendeve evropiane të reduktojnë varësinë nga antibiotikët, pasi përdorimi i tepërt i tyre përshpejton zhvillimin e rezistencës antimikrobike. Kjo ndodh kur bakteret ose patogjenë të tjerë përshtaten dhe nuk reagojnë më ndaj trajtimeve ekzistuese, duke i bërë infeksionet më të vështira për t’u trajtuar. Si pasojë, rezistenca antimikrobike shkakton mbi 35 mijë vdekje çdo vit në Bashkimin Evropian, Islandë, Lihtenshtajn dhe Norvegji.

Në vitin 2023, Këshilli i BE-së u kërkoi vendeve anëtare të ulin përdorimin e antibiotikëve dhe të sigurojnë që të paktën 65 për qind e tyre të jenë trajtime të linjës së parë. Megjithatë, sipas Qendrës Evropiane për Parandalimin dhe Kontrollin e Sëmundjeve, asnjë nga këto objektiva nuk është arritur.

Të dhënat tregojnë se në vitin 2024, në BE janë përdorur mesatarisht 20.3 doza ditore antibiotikësh për 1,000 banorë, shifër kjo më e lartë se në vitin 2019 dhe dukshëm mbi objektivin prej 15.9 dozash deri në vitin 2030.

Dallimet mes vendeve janë të mëdha: nga 9.8 doza ditore në Holandë, deri në 29.9 në Greqi. Sipas ekspertëve, kjo lidhet me ritmin e ndryshëm të zbatimit të udhëzimeve shëndetësore në spitale, klinika dhe tek mjekët, si dhe me ndërgjegjësimin e pacientëve.

Në disa shtete evropiane, përdorimi i antibiotikëve është rritur që nga viti 2020, përfshirë Austrinë, Francën, Spanjën, Belgjikën dhe disa vende të Evropës Veriore dhe Lindore.

Autoritetet shëndetësore theksojnë nevojën për përmirësimin e diagnostikimit, parandalimin më të mirë të infeksioneve dhe përdorimin më të kujdesshëm të antibiotikëve. Ndërkohë, qytetarët këshillohen që të ndjekin plotësisht trajtimet e përshkruara nga mjeku dhe të mos i ndërpresin apo ruajnë ilaçet për përdorim të mëvonshëm.