Vetëvendosje e çon Marrëveshjen në Kushtetuese

Partia që kryesohet nga Albin Kurti konsideron që marrëveshja Kosovë-Serbi tejkalon bazën kushtetuese të Kosovës. Vetëvendosje kërkon sqarim nga Gjykata Kushtetuese

Lëvizja Vetëvendosje e cila ka kundërshtuar nga fillimi bisedimet Kosovë-Serbia, ka vendosur që Projektligjin për Ratifikimin e Marrëveshjes mes Kosovës dhe Serbisë ta çoj në Gjykatë Kushtetuese. Vetëvendosje konsideron se marrëveshja është në kundërshtim me Kushtetutën.   

“Lëvizja Vetëvendosje konsideron që në pamundësi të një vlerësimi të plotë juridik e konstitucionalist nga Komisioni për legjislacion, është e domosdoshme që marrëveshjen dhe përputhjen e saj me parimet, frymën dhe germën e Kushtetutës, ta vlerësojë Gjykata Kushtetuese e Republikës së Kosovës”, thuhet në një deklaratë të Vetëvendosjes.

Sipas kësaj të fundit, do të jetë gjykata Kushtetues e cila do të vlerëson objektivisht nëse ka apo jo bazë juridike për miratim të marrëveshjes.

Ky qëndrim i kësaj partie opozitare ka ardhur pasi Komisioni për Legjislacion i Kuvendit të Kosovës, diskutuar për Projektligjin për Ratifikimin e Marrëveshjes mes Kosovës dhe Serbisë.

Qëndrimet e deputetëve, anëtarë të këtij Komisioni, ka qenë të ndara në atë nëse marrëveshja është në kundërshtim me Kushtetutën e Republikës së Kosovës.

“Natyrisht që ka elemente në Planin e zbatimit që e shtojnë dëmin që prodhon marrëveshja, por para së gjithash dhe mbi të gjitha është Marrëveshja ajo që e bën Planin e zbatimit të dëmshëm, të padrejtë dhe antikushtetues:, konsideron Vetëvendosje.

Ratifikimi i Marrëveshjes pa Planin e zbatimit, sipas tyre, nuk e ndryshon fare as marrëveshjen e as efektin e saj juridik e praktik në Kosovë.

“Propozimi që Marrëveshjen ta ratifikojmë pa Planin e zbatimit, realisht është thirrje për ratifikim të Marrëveshjes dhe asgjë tjetër. Pra, vetëm mosratifikimi i Marrëveshjes e bën të pazbatueshëm planin”, konsideron Albulena Haxhiu nga kjo Lëvizje.

Ndryshe, Kuvendi i Kosovës në seancën e ardhshme plenare duhet ta miratoj Planin e Zbatimit të Marrëveshjes ndërmjet Kosovës dhe Serbisë. Kësaj marrëveshje siç është kërkuar nga Beogradi, duhet t’i paraprij miratimi i ligjit për amnisti, me të cilin Kosova garanton që serbet e veriut nuk do të ndiqen penalisht.