Vetëvendosje: Qeveria, politikë diskriminuese për mërgimtarët

"Secili mërgimtar që vjen në Kosovë, paguan dyfish. Së pari në vendin prej nga vjen dhe më pas ngarkohet me pagesë edhe në Kosovë"

Lëvizja Vetëvendosje ka kundërshtuar sot politikat të cilat Qeveria e Kosovës po i udhëheq ndaj diasporës, duke i quajtur ato “politika diskriminuese”.

Përfaqësuesja e Vetëvendosjes, Puhie Demaku, ka thënë se Qeveria po i “plaçkit” mërgimtarët kosovarë gjatë kthimit në atdhe, duke i detyruar të paguajnë sigurimin shtesë për automjetet e tyre, me të cilat ata hyjnë në Kosovë.

“Secili mërgimtar që vjen në Kosovë paguan dyfish. Së pari në vendin prej nga vjen dhe më pas ngarkohet me një shumë prej, përafërsisht, 50 euro për një muaj qëndrimi në Kosovë”, ka thënë Demaku

Sipas saj, e dhimbshmja e kësaj është se Shoqata e Kompanive të Sigurimeve të Kosovës, vendos në mënyrë arbitrare për çmimet që i ka vendosur dhe se me vendim politik, nga polisa kufitare është liruar çdo veturë me targa të Serbisë dhe Malit të Zi.