Nuland sot në Kosovë, javën tjetër specialja sërish në Kuvend

i vizitës lidhet me presionet e shtuara amerikane për liderët kosovarë që ta riprocedojnë në Kuvend çështjen e amendamentimit kushtetues që i hap rrugë themelimit të Gjykatës Speciale për Krime Lufte

Në Kosovë sot pritet të vije për vizitë Zëvendëssekretarja e Departamentit Amerikan të Shtetit, Victoria Nuland. Siç njofton Zyra për Shtyp e Presidencës së Kosovës, agjenda e Nuland ka paraparë takim me Presidenten Atifete Jahjaga dhe me kryetarin e Kuvendit Kadri Veselin.

Përderisa nuk ka njoftime nëse Nuland do të ketë takim me kryeminsitrin e Kosovës, Isa Mustafën apo me zëvendësin e tij Hashim Thaçin, të njëjtën agjendë të presidencës e ka bërë të ditur edhe Zyra për Shtyp e Kuvendit të Kosovës.

“Kryetari i Kuvendit Republikës së Kosovës, Kadri Veseli, të dielën, më 12.7.2015, në orën 15, do të ketë takim me znj.Victoria Nuland, ndihmëse për çështje të Evropës dhe Azisë e sekretarit të shtetit, John Kerry”, thuhet në njoftimin për media të lëshuar nga Kuvendi i Kosovës.

Siç citojnë mediat e Prishtinës burime diplomatike amerikane, Nuland do të vijë në Prishtinë e shoqëruar edhe nga Ndihmëssekretarja e Shtetit të Mbrojtjes për Ukrainë, Rusi dhe Euroazi, Eveline Farkash, ndërkaq qëllimi i vizitës lidhet me presionet e shtuara amerikane për liderët kosovarë që ta riprocedojnë në Kuvend çështjen e amendamentimit kushtetues që i hap rrugë themelimit të Gjykatës Speciale për Krime Lufte.

Siç raporton agjencia e lajmeve “Kosovapress”, zyratrarë të lartë të Kuvendit të Kosovës e kanë konfirmuar se javën që vjen Qeveria e Kosovës do ta riprocedojë sërish në Kuvend amandamentin 24 të Kushtetutës, për ndryshim, dhe do t’i çelet rruga themelimit të Gjykatës Speciale.