Vijnë analizat: nafta është cilësore

Në Ministrinë e Tregtisë kanë arritur analizat e 22 mostrave të cilat tregojnë se nafta që shitet në Kosovë është sipas standardeve të përcaktuara

Ministria kosovare e Tregtisë dhe Industrisë (MTI) ia ka garantuar qytetarët se nafta që shitet në Kosovë i plotëson të gjitha parametrat e lejuar. Kjo ministri të hënën i ka pranuar analizat e 22 mostrave, të cilat tregojnë se nafta dhe benzina që shiten në Kosovë janë të mira dhe nuk ka vend për shqetësim.

“Të hënën, në MTI kanë arritur analizat e 22 mostrave të marra në pikat shitëse të karburanteve dizell dhe benzinë. Sipas këtyre të dhënave preliminare, në Kosovë tregtohet naftë me standarde e përcaktuara nga Ministria e Tregtisë dhe Industrisë”, thuhet në deklaratë.

Nga mostrat e analizuar vetëm 5 për qind e tyre mostra, siç thuhet, kanë dalë jo konform stadardit të lejuar me Udhëzimin Administrativë për cilësinë e karburanteve të lëngëta të naftës, me një tejkalim të vogël të normave.

Aksioni është ndërmarrë nën monitorimin e ministrit Ismet Mulaj.

Ndryshe, inspektorët e Tregtisë dhe Industrisë, në bashkëpunim me trupat inspektuese të cilësisë dhe sasisë së karburanteve, në bashkëpunim edhe me Shoqatën e naftëtarëve kosovarë, kanë rekomanduar marrjen e disa mostrave në disa pika të dyshimta për t’i analizuar, pas dyshimeve se nafta po shtetet e përzier edhe me gazuar të tjera.

“Në bazë të analizave të dala, i sigurojmë konsumatorët se karburantet që tregtohen brenda territorit të Kosovës janë brenda parametrave të lejuar dhe nuk ka vend për shqetësim. Përkundër rezultateve të dala, MTI fton qytetarët që në rast të dyshimit për cilësinë e karburanteve të njoftojnë autoritetet për mbrojtjen e konsumatorëve pranë MTI-së”, thuhet në njoftim.

Ditët në vazhdim, siç thuhet në deklaratë, MTI pret rezultatet e mostrave të dërguara në laboratorët evropiane.

“Ky veprim shtesë, pa paralajmërim, është ndërmarrë për të qartësuar dyshimet e ngritura rreth cilësisë së karburanteve që tregtohen brenda vendit”, thuhet në qëndrimin e ministrisë.