Vijon shpërndarja e teksteve mësimore për diasporën

Mësimi i gjuhës shqipe po zhvillohet me rregull në shumë shtete të botës

Mësimi plotësues i gjuhës shqipe për fëmijët e diasporës po zhvillohet me shumë përkushtim dhe rregull në një numër të madh shtetesh anembanë botës, me theks të veçantë në vendet e Evropës. Ky angazhim për ruajtjen dhe përhapjen e gjuhës amtare është dëshmi e dashurisë së madhe që shqiptarët jashtë atdheut kanë për kulturën dhe identitetin e tyre kombëtar, shkruan albinfo.ch.

Në vende si Zvicra, Italia dhe Gjermania, numri i nxënësve që ndjekin mësimet e gjuhës shqipe është ndër më të lartit në Evropë. Tashmë, të gjitha klasat janë pajisur me librat e gjuhës shqipe të siguruar nga institucionet shqiptare, çka e bën procesin mësimor edhe më cilësor dhe të organizuar. Mësimet zakonisht zhvillohen ditëve të shtunë, duke u dhënë mundësi fëmijëve që gjatë javës ndjekin shkollat vendase të përfshihen në ruajtjen e gjuhës së tyre amtare.

Edhe në Selanik, procesi i mësimit të gjuhës shqipe po ecën me sukses. Regjistrimeve të javës së kaluar iu shtuan librat e siguruar nga Konsullata e Përgjithshme e Republikës së Shqipërisë në Selanik, të cilat patëm nderin dhe kënaqësinë t’i shpërndante znj. Dobrushi, Konsulle e Përgjithshme. Mësimet zhvillohen çdo të shtunë, nga ora 17:00 deri në 19:00, në Shkollën Publike Greke Nr. 89. Falënderime të veçanta për mësueset Silva Agolli Mile dhe Bruna Toshkezi, si dhe për të gjithë prindërit që sjellin fëmijët e tyre me dashuri për gjuhën shqipe.

---