Visar Ymeri i VV mori pjesë në Forumin “Crans Montana” në Vjenë

Siç mëson “albinfo.ch”, pas forumit, Ymeri ka mbajtur edhe një takim me bashkatdhetarët ku janë diskutuar tema të rëndësishme mbi situatën në Kosovë

Kryetari i Lëvizjes Vetëvendosje, Visar Ymeri nga 29 deri më 1 korrik ka qëndruar në Vjenë ku ka qenë i ftuar të marrë pjesë në forumin ndërkombëtar “Crans Montana” mbi Evropën Qendrore dhe Evropën Lindore, njofton “albinfo.ch”.

Forumi u zhvillua në Vjenë, nën Patronazhin e Presidentit të Austrisë, dhe sipas njoftimit të vetë Ymerit në të morën pjesë me qindra përfaqësues qeveritarë, deputetë, përfaqësues të organizatave ndërkombëtare, dhe investitorë të ndryshëm.

Disa prej përfaqësuesve ishin Bujar Nishani, President i Republikës së Shqipërisë, Stipe Mesiç – ish President i Kroacisë, László Baranyay – Zv/President i Bankës Evropiane për Investime, Christine Beerli – ZV/Presidentja e Kryqit të Kuq, Filip Vujanoviq, President i Malit të Zi, etj.

“Forumi u përqendrua në krijimin dhe forcimin e lidhjeve mes shteteve të Evropës Qendrore dhe Lindore, në zhvillimin e marrëdhënieve ekonomike të secilit shtet, me qëllim rritjen e bashkëpunimit si dhe të investimeve direkt të huaja. Gjatë punimeve mora pjesë si diskutues në disa prej sesioneve të mbajtura gjatë Forumit, si dhe pata rastin te takohem dhe diskutoj me një numër të pjesëmarrësve”, ka njoftuar kreu i VV-së, Visar Ymeri.

Siç mëson “albinfo.ch”, pas forumit, Ymeri ka mbajtur edhe një takim me bashkatdhetarët ku janë diskutuar tema të rëndësishme mbi situatën në Kosovë.