Vodhën parfume me vlerë prej 124.000 eurosh

Që nga punësimi i kosovarit, malli në depo po "avullohej". Në fund ai u kap me pakot e parfumit të bëra gati për transport

Pronarët e një parfumerie në qendrën e Munihut kishin vënë re prej disa muajsh se nga lokali i tyre po mungonte një sasi e madhe e parfumeve.

Hetimet e brendshme e gjetën shpejtë shkaktarin. Ai ishte një kosovar 26 vjeçar i cili po punonte prej një viti si depoist në parfumeri. Nga punësimi i tij malli në depo po “avullohej” me të madhe, derisa në fund ishte konstatuar se mungonin mallra me vlerë prej 124.000 eurosh.

Të martën, më 25 tetor, policia përfundimisht mundi të ndjekë dhe të të kapë në vepër kolegun e depoistit, një kosovar 28 vjeçar, i cili po e nxirrte nga një dalje anësore e lokalit një arkë të madhe me 62 shishe parfumi, për ta ngarkuar në një makinë të bërë gati. Pakoja ishte përgatitur me kujdes nga depoisti dhe ishte bërë gati për transport.

Pas kapjes, policia kontrolloi makinën si dhe banesat e të dy hajnave të dyshuar. Me këtë rast u gjetën edhe sasi të tjera të mallit të vjedhur.

Pas marrjes në pyetje, dhe pasi pranuan pjesërish veprën, ata u lanë të mbrohen në liri.