Von der Leyen në Kosovë më 15 tetor

Ursula von der Leyen viziton Ballkanin Perëndimor, në Kosovë më 15 tetor

Presidentja e Komisionit Evropian, Ursula von der Leyen, pritet ta vizitojë Kosovën me datën 15 tetor në kuadër të një turneu nëpër të gjitha gjashtë shtetet e Ballkanit Perëndimor. Këtë e mëson Koha nga burimet e saja në Bruksel.

Do të jetë kjo vizita e saj e parë në rajon në mandatin e dytë në krye të Komisionit Evropian, përcjell albinfo.ch

Ajo ishte në Kosovë edhe para një viti, më saktësisht me 24 tetor, në fund të mandatit të saj të parë. Por që atëherë dihej se ajo do të jetë në krye të Komisionit Evropian edhe për një mandat të ri pesëvjeçar.

Vizita e para një viti e saj në Kosovë ishte plot entuziazëm. Ajo në konferencë për shtyp pat shprehur urime për qeverinë dhe kryeministrin Albin Kurti për një punë të mrekullueshme në agjendën e reformave dhe kishte premtuar se deri në fund të atij viti, pra të vitit 2024, Komisioni do të realizoj pagesën e parë në vlerë prej mbi 60 milionë eurosh për Kosovën nga Plani i Rritjes për Ballkanin Perëndimor.     

Por një vit më vonë, Von der Leyen do e gjejë Kosovën në një situatë krejt të ndryshme në një ngërç politik, pa institucione të formuara sipas zgjedhjeve të fundit, ndërsa pagesa e mjeteve të para financimit nga Pakoja e Rritjes jo vetëm se nuk janë realizuar në vitin 2024 por nuk mund të realizohen as këtë vit, e pikëpyetje është se kur do të mund të realizohen. Kosova në këtë mënyrë po e paguan çmimin e mungesës së një Kuvendi të konstituuar dhe një qeverie e cila do të mund të kryente miratimin dhe ratifikimin e marrëveshjes me BE-në për pagesat nga ky plan. Kosova, krahas Bosnje e Hercegovinës, ka mbetur e vetmja që nuk i ka marrë pagesat e para nga ky plan.

Pritet që Von der Leyen gjatë qëndrimit në Kosovë të takohet me presidenten Vjosa Osmani dhe po ashtu edhe me kryeministrin në detyrë Albin Kurti. Hollësitë për agjendën e saj në Kosovë janë duke u koordinuar nga Zyra e BE-së në Prishtinë prandaj diplomatët evropianë nuk janë të sigurt se në cilin objekt Von der Leyen do të takojë Kurtin. Zyra e BE-së para disa muajsh kishte vendosur që pjesëtarët e qeverisë në detyrë të mos i takoj nëpër zyra të qeverisë pas një vendimi të Gjykatës se ata nuk mund të mbajnë paralelisht poste edhe në Kuvend edhe në qeveri.

Vizita e presidentes së Komisionit Evropian vjen vetëm disa javë para miratimit të Raporteve vjetore të  progresit për vendet e zgjerimit. Kjo vizitë, sipas burimeve në Bruksel, ka qenë një prej arsyeve pse këto raporte nuk do të miratohen në mesin e muajit tetor por në javën e parë të muajit nëntor.

Von der Leyen do të përsërit përkushtimin e Komisionit Evropian për rajonin dhe perspektivën e tyre për anëtarësim në BE. Por me përjashtim të Shqipërisë dhe Malit të zi asnjë vend tjetër i rajonit nuk ka avancuar fare në këtë proces. Von der Leyen vizitën në vendet e rajonit pritet ta nis në Tiranë me 13 tetor ndërsa do të vizitoj edhe Malin e zi, Maqedoninë e Veriut, Serbinë dhe Bosnje e Hercegovinën.            

---