Voziti 417 km/h në Gjermani, milioneri çek rrezikon dënim me burg

Çeku mund të përballet me një dënim prej dy vjet burgim ose një gjobë të konsiderueshme parash nëse shpallet fajtor.

Prokurorët gjermanë kanë nisur hetimet ndaj një milioneri çek, i cili dyshohet se ka vozitur përgjatë një autostrade me shpejtësi deri në 417 km/h.

Radim Passer akuzohet se ka mbajtur një garë të paligjshme motorike në autostradën A2 midis Berlinit dhe Hannoverit në korrik të vitit 2021.

Shoferi i automjetit “Bugatti Chiron” kishte regjistruar incidentin dhe kishte postuar një video në YouTube në fillim të këtij viti, duke marrë kritika të gjera në Gjermani, raporton Euronews, përcjell Albinfo.ch.

Milioneri 58-vjeçar ka vozitur “me shpejtësi të papërshtatshme, duke mos respektuar rregullat e trafikut dhe në mënyrë të pakujdesshme, për të arritur shpejtësinë maksimale të mundshme”, thanë prokurorët.

 

---