Washington DC: Yllka Gashi, Dua Lipa, Vjosa Osmani dhe Blerta Basholli

Presidentja Osmani takon Dua Lipën, Yllka Gashin dhe Blerta Bashollin në Washington

Presidentja e Kosovës, Vjosa Osmani, gjatë këtyre ditëve po qëndron në SHBA për vizitë zyrtare, transmeton albinfo.ch.

Gjatë kësaj vizite ka realizuar edhe një takim me skenaristen dhe regjisoren e filmit “Zgjoi”, Blerta Basholli, film që është duke u shfaqur në Amerikë.

Ky film ka bërë bashkë një numër të madh të grave të Kosovës, të cilat janë të suksesshme në fusha të ndryshme.

Në një fotografi shihen bashkë presidentja e Kosovës, Vjosa Osmani, këngëtarja e suksesshme botërore, Dua Lipa, Blerta Basholli, e cila po shënon një sukses të jashtëzakonshëm me filmin “Zgjoi”, dhe Yllka Gashi, figura kryesore e këtij filmi, e cila për rolin e saj tashmë ka marrë disa çmime të mëdha ndërkombëtare.

“Zgjoi” po jepet gjatë këtyre ditëve premierë në kinematë në SHBA dhe ka arritur tashmë në Washington DC për komunitetin shqiptar atje, por edhe për audiencën globale.

Këto imazhe nga takimi i katër femrave të famshme të Kosovës në Amerikë u publikuan nga faqja e fondacionit Sunny Hill News.

Artistja Dua shihet shumë e buzëqeshur teksa ka uruar nga afër Blertën dhe Yllkën për sukseset botërore të filmit “Zgjoi”.

---