Wenger e mbron Xhakën

Granit Xhaka ka marrë mbështetjen nga trajneri i tij, Arsene Wenger, për dy rastet e fundit, ku u ndëshkua me karton të kuq dhe akuzohet për racizëm

Atëherë kur kishte më së shumti nevojë, Granit Xhaka ka marrë përkrahjen nga trajneri i tij, Arsene Wenger, shkruan albinfo.ch.

Xhaka të dielën u ndëshkua me karton të kuq, dhe do të mungojë në katër ndeshje, kurse një ditë më pas, sipas mediave angleze e ka ofenduar një punonjëse të aeroportit. Për këtë Graniti është kritikuar shumë.

Megjithatë, atij në ndihmë i ka dalë trajneri i tij. “E kam shikuar edhe një herë dhe nuk ishte një ndërhyrje e rrezikshme. Mirëpo, ju duhet ta pranoni se mund të ndëshkoheni dhe duhet të mësoni nga kjo”, ka thënë Wenger për kartonin e kuq të Xhakës.

Francezi ka shtuar se mesfushori shqiptar është inteligjent, por duhet të jetë i kujdesshëm. “Nuk mendoj se Graniti mendon ta lëndojë dikë. Fatkeqësisht, ne do ta humbim atë për katër ndeshje në një fazë të rëndësishme të sezonit. Graniti është inteligjent në fushë, por duhet të përmirësohet tek ndërhyrjet. Më mirë është të mos ‘zhagitet’ duke u munduar t’ia marrë topin kundërshtarit”, theksoi Wenger.

Gjithmonë sipas mediave angleze, Wenger dhe Xhaka kanë folur për incidentin e fundit dhe Graniti ka mohuar se ka ndodhur një gjë e tillë.