Wenger kritikon Xhakën

Trajneri i Arsenalit, Arsene Wenger ka këshilluar futbollistin e tij që të jetë më i vëmendshëm herët e ardhshme

Granit Xhaka është kritikuar për kartonin e kuq të marrë në ndeshjen e fundit në Premierligë kundër Swanseas. Ky ishte kartoni i tetë i kuq për yllin e Zvicrës në dy vitet e fundit, shkruan albinfo.ch.

Por, ai është kritikuar se ka qenë i pakujdesshëm. Arsene Wenger ka thënë se ai duhet të jetë më i vëmendshëm herët e ardhshme. “Kam biseduar me të. Por, është vetëm një karton i kuq dhe ne nuk jemi përgjegjës për të kaluarit ku ai i mori tjetërkund. Ai bëri një ndërhyrje që mund të ishte për karton të verdhë apo të kuq dhe nuk ishte me qëllim që të lëndonte dikë. Mendoj se ai është inteligjent sa duhet për të analizuar këtë”, ka thënë Wenger.

Edhe futbollisti i Arsenalit, Alex Oxlande-Chamberlain konsideron përjashtimin e Xhakës të drejtë, duke thënë që kosovari s’ka pse të ankohet.

“Isha jashtë fushe dhe thosha me vete: ‘Padyshim se ai do të përjashtohet’. Gjyqtarët na shpjeguan vendimin se ishte i drejtë, prandaj mendoj se ai nuk mund të ankohet. Ai nuk është lojtar i dhunshëm, por ndonjëherë është i ngathtë”, deklaroi Chamberlain.