Xhaka dhe Sadiku, lojtarët më në formë të kombëtares shqiptare

Dyshja shqiptare që lua në kampionatin zviceran, Armando Sadiku (FC Vaduz) dhe Taulant Xhaka (FC Basel) konsiderohen si lojtarët më në formë të kombëtares shqiptare

Ndonëse ekipi i tij Vaduzi nuk po arrin të këndellet, megjithatë Armando Sadiku nuk rresht së shënuari gola.  Sulmuesi i kombëtares shqiptare Armando Sadiku e gjeti edhe një herë rrugën e rrjetës në Superligën e Zvicrës. Goli i tij erdhi pikërisht për të barazuar rezultatin për ekipin, por gëzimi i tij nuk zgjati deri në fund, pasi që në përfundim të ndeshjes fitues doli ekipi kundërshtar, Young Boys.

Falë Sadikut Vaduzi është edhe në finalen e Kupës së Zvicrës ku mund të kualifikohet për në Ligën e Evropës.

Me golat e shënuar që nga kalimi i tij nga FC Zurich në Vaduz, Sadiku është duke shfaqur performacë të jashtëzakonshme dhe aktualisht është sulmuesi më në formë i kombëtares shqiptare dhe thuajse e ka të siguruar “biletën” për të qenë pjesë e ekipit të kombëtares në “Euro 2016”.

Formë të mirë në mesfushë vazhdon të shfaq edhe lojtari tjetër i kombëtares në FC Bazel, Taulant Xhaka. Edhe në formacionin e javës së 28-të të Superligës Zvicerane, Taulant Xhaka ka zë vend në 11-ëshen më të mirë të kësaj jave. Gazeta zvicerane “Blick” shkruan se është lehtë ta kuptosh kur Xhaka ndodhet në ditën e tij të mirë. “ Si mund ta dish kur ai është në ditën e tij të mirë: I gjallë, i fortë dhe i saktë në ndërhyrje. Praktikisht pa gabime”, transmeton “albinfo.ch”.