Zaev: Duam zgjidhje me Greqinë, por jo me çdo çmim

Kryeministri i Maqedonisë, Zoran Zaev, ka thënë se do të bëjnë gjithçka që është e mundur për zgjidhjen e çështjes së emrit. Por, ai nuk zbuloi asnjë detaj rreth përcaktuesit të pranueshëm gjeografik, në mënyrë që të mos dëmtojë negociatat.

“Maqedonia e ndryshoi Kushtetutën e saj në vitin 1993 që ta precizonte Nenin 49 me amendamentin 2. Bëmë hap të madh si vend atë vit që ta largojmë irredentizmin. Për momentin, gjithçka që bëjmë është të dëshmojmë se Maqedonia nuk ka kurrfarë aspiratash territoriale, irredentiste. Maqedonia dëshiron të ndërtojë miqësi dhe në këtë aspekt nuk shoh nevojë”, deklaroi ai, përcjell albinfo.ch.

Megjithatë VMRO-DPMNE-ja opozitare kërkon sqarim të detajuar nga Zaevi nëse negociohet për identitetin dhe nëse ka dobi nga riemërimi i aeroportit dhe autostradës.