Zbulohet në Zvicër një rrjet mashtruesish të “romance scam”, arrestohen 10 persona

Autoritetet zvicerane zhvilluan operacion në gjashtë kantone, duke goditur një grup të dyshuar nigerian që mashtronte gra përmes premtimeve për lidhje romantike.

Policia zvicerane ka arrestuar dhjetë persona të martën në kuadër të një operacioni kundër një rrjeti mashtruesish që kryenin të ashtuquajturat “romance scams”, një formë mashtrimi ku viktimat, kryesisht gra, manipulohen emocionalisht për të dërguar para, përcjell albinfo.ch.

Arrestimet lidhen me një grup të dyshuar nigerian që vepronte në disa pjesë të Zvicrës. Në kuadër të operacionit janë kryer kontrolle dhe bastisje në gjashtë kantone të vendit.

Operacioni është udhëhequr nga Prokuroria Publike e Cyrihut, ndërsa hetimet janë zhvilluar për një kohë të gjatë nga policia kantonale dhe ajo komunale e Cyrihut.

Sipas autoriteteve, hetimet kishin në shënjestër anëtarë të një grupi kriminal që dyshohet se ishin të përfshirë në aktivitete të ndryshme kriminale, përfshirë mashtrimin e grave duke u premtuar lidhje romantike dhe më pas duke u kërkuar para./Albinfo.ch

---