Zbulohet një variant i ri Omicron në Zvicër

(KEYSTONE/Ti-Press/Alessandro Crinari)

Ndërsa numri i përgjithshëm i infeksioneve Covid vazhdon të bjerë – 11 për qind më pak raste u raportuan të martën në krahasim me javën e kaluar – një variant i ri i Omicron, BA.2.75, tashmë ka arritur në Zvicër nga Azia Juglindore, njofton albinfo.ch.

Deri më tani, vetëm disa raste janë zbuluar në Zvicër, por ky variant “mund të bëhet patjetër dominant”, sipas Richard Neher, analist i viruseve në Universitetin e Bazelit.

Varianti i ri është “ndoshta pak më virulent, domethënë më ngjitës se variantet e tjera të Omicron”, tha Neher.

Të hënën, Zvicra miratoi një vaksinë të re Moderna, e cila synon më mirë nënvariantet e Omicron-it, por data e prezantimit ende nuk është publikuar.