Zbulohet zëvendësimi për lëkurën e njeriut

"Kemi arritur t`i izolojmë të gjitha qelizat e nevojshme nga lëkura e njeriut dhe nga kjo të krijojmë një zëvendësim të lëkurës që për herë të parë përmban në vete edhe enët e gjakut dhe ato limfatike"

MIliona njerëz brenda vitit pësojnë djegie të shkallëve të ndryshme të lëkurës. Për shumë prej tyre, zbulimi më i ri, i realizuar nga shkencëtarët e Univeristetit të Cyrihut, do të ketë domethënie të madhe.

Për të ndërhyrë në rastet e dëmtimeve të rënda të lëkurës si djegia, kirurgët plastikë kanë nevojë për inde të shëndetshme që do të zëvendësonin lëkurën e dëmtuar. Në trupin e njeriut ka “material” për zëvendësim (zakonisht hiqet nga kofshët ose pjesë të tjera të trupit) por ai është në dispozicion vetëm në një masë të kufizuar. Veç kësaj, “shartimi” i tillë i lëkurës sidomos te fëmijët dhe të rinjtë, për shkak të procesit të rritjes, paraqitet problematik që i bën të detyrueshme operacionet pasuese. Kjo është arsyeja përse shkencëtarët nga e gjithë bota vazhdimisht janë në kërkim të krijimit në laborator të një zëvendësimi të plotë për lëkurën.

Tani, për herë të parë kjo është bërë e mundur në masë të madhe falë studiuesve zviceranë. Ata kanë pasur sukses të rrisin qelizat e lëkurës ku bëjnë pjesë edhe enët e gjakut dhe enët limfatike. Në këtë mënyrë indet biologjike të prodhuara artificialisht kanë cilësinë për t`u pranuar shumë më mirë nga trupi. Kjo do të bëjë që transplantimet të kenë një shans më të lartë të suksesit, bëhet e ditur në një komunikatë të Universitetit të Cyrihut.

“Pëlhurat” e tilla që zëvendësojnë lëkurën, bazën e tyre e kanë në qelizat që hulumtuesit i marrin nga dhuruesit, të cilat pastaj shumëzohen. Deri më tash prodhimi në këtë mënyrë i lëkurës, kërcës dhe enëve të gjakut është treguar i suksesshëm. Por ka qenë problem të prodhohen edhe gjaku, enët limfatike, pigmenti, gjëndrat e djersë, flokët dhe nervat.

“Ne kemi pasur sukses që t`i izolojmë të gjitha qelizat e nevojshme nga lëkura e njeriut dhe nga kjo të krijojmë një zëvendësim të lëkurës që për herë të parë përmban në vete edhe enët e gjakut dhe ato limfatike”, ka thënë Martin Meuli, udhëheqës i Klinikës Kirurgjike në Spitalin e Fëmijëve në Cyrih.

Kjo klinikë që nga viti 2001 është duke bërë përpjekje në këtë drejtim por vetëm tash, siç është konstatuar nga studimet paraklinike, është arritur që një lëkurë e tillë të implantohet në trupin e njeriut duke lënë pak ose fare vrragë në trup dhe duke u rritur bashkë me të.

Zbatimi për herë të parë në praktikë i këtij zbulimi të rëndësishëm përmes ndërhyrjeve komplekse, sipas Universitetit të Cyrihut, do të jetë i mundur qysh gjatë këtij viti. Por njëherë pa përfshirjen e enëve të gjakut dhe atyre limfatike. Për to duhet pritur lejen përkatëse, thuhet në komunikatën e shërbimit për komunikim të Universitetit të Cyrihut.