Zgjatet mandati i trupave gjermane në Kosovë

Parlamenti gjerman miratoi të enjten në mbrëmje në Berlin zgjatjen e mandatit të trupave gjermane në Kosovë edhe me një vit tjetër

Në një votim të hapur, 489 deputetët e parlamentit gjerman votuan pro zgjatjes së pjesëmarrjes së trupave gjermane në KFOR, dhjetë abstenuan dhe 66 e refuzuan.

Prania e ushtarëve gjermanë në Kosovë do të reduktohet deri 900 ushtarë.

Numri maksimal i ushtarëve gjermanë që lejohen të jenë të pranishëm në Kosovë u ul në 1850.

Debatin e parlamentit e ndoqi edhe ministri kosovar i Punëve të Jashtme Enver Hoxhaj, raporton DW.

Në vizitën e tij të parë zyrtare si ministër i Punëve të Jashtme të Kosovës, Enver Hoxhaj shfrytëzoi rastin të ndiqte nga tribuna e mysafirëve debatin që deputetët gjermanë zhvillojnë çdo vit në Berlin për të legjitimuar praninë e ushtarëve gjermanë në Kosovë.

“Gëzohem në mënyrë të veçantë që ju keni ardhur këtu për të ndjekur këtë seancë”, tha funksionari i Unionit Kristiandemokrat e Kristiansocial, Florian Hahn.

“Kjo tregon se ju jeni të interesuar për zhvillimin e vendit tuaj dhe për një Evropë të përbashkët”, tha Hahn.

Për tatimpaguesit gjermanë, angazhimi i Bundeswehr-it në Kosovë gjatë vitit të ardhshëm kushton afro 76 milionë euro.