Zjarr në Spitalin e Pejës, digjet dhoma ku ishin pajisjet e teknologjisë informative

Raportohet se kati IV i Spitalit të Përgjithshëm në Pejë është përfshirë nga zjarri sot rreth orës 4:00 të mëngjesit, përcjell albinfo.ch.

Sipas njoftimit të Spitalit, nga zjarri janë shkaktuar dëme materiale.

“Me intervenimin e shpejtë është ndalur përhapja e zjarrit, por një dhomë ku kanë qenë pajisjet e teknologjisë informative është djegur dhe tani jemi në proces të konstatimit të dëmit material.

Sa i përket databazës dhe të dhënave të tjera, të gjitha janë të ruajtura, ngase janë të lidhura me sisteme të tjera informative dhe asnjë e dhënë apo data bazë nuk është humbur”, thuhet në njoftim.

Derisa bëhet e ditur se puna në spital është duke vazhduar normalisht. “Shërbimet ndaj pacientëve kanë vazhduar dhe po vazhdojnë të jepen si gjithnjë dhe puna po vazhdon normalisht, ndërsa ekipet e shërbimeve teknike janë duke u marrë me pastrimin dhe riparimet e nevojshme në dhomën e djegur dhe ambientet e tjera të katit IV të bllokut Kirurgjik”, përfundon njoftimi.