Zvicër: 184 persona në vit humbin jetën gjatë marrjes me sport

Duke bërë ecje nëpër male, ngjitje ose alpinizëm dhe gjatë skijimit, mesatarisht kanë humbur jetën 120 persona në vit

Për çdo vit në Zvicër vdesin 184 persona nga pasojat e marrjes me sport. Çdo i treti i vdekur është turist i huaj, i cili ka ardhur në Zvicër për të ushtruar sportin ose hobin e tij, që në të shumtën e rasteve ka të bëjë me sportet dimërore, shkruan srf.ch.

Këshillimorja për mbrojtje nga aksidentet (BFU) ka dalë sot me një raport lidhur me një studim të realizuar ku trajtohen të gjitha aksidentet që kanë të bëjnë me sportin, të ndodhura nga viti 2000 deri në vitin 2018.

Shumica e madhe e viktimave kanë humbur jetën maleve, transmeton albinfo.ch. Duke bërë ecje nëpër male, ngjitje ose alpinizëm dhe gjatë skijimit, mesatarisht kanë humbur jetën 120 persona në vit.

Por megjithatë, sipas BFU-së numri absolutisht më i madh i të vdekurve i identifikuar me sportet dimërore, nuk flet patjetër për rrezikshmërinë më të madhe të një lloji konkret të sportit në krahasim me sportet tjera.

Në këtë kuptim, duhet të kihet parasysh numri i njerëzve që merren me atë sport, përcjell albinfo.ch. Kjo domethënë se në krahasim me masivitetin e sporteve dimërore në Zvicër, numri i vdekjeve në male nuk është mbiproporcional me atë të sporteve tjera. Veç kësaj, për shumë lloje sportesh nuk ka shënime të sakta për numrin e viktimave.

---