Zvicër: Më pak pensionistë invaliditeti, por më shumë raste sociale

Sigurimi i invaliditetit (IV) është duke kursyer në llogari të fondit të ndihmave sociale. Ajo i referohet në këtë rast shifrave nga Zyra Federale për Sigurime Sociale (BSV)

Ndërkohë që në vitin 2005 në Zvicër kanë qenë 252.000 pensionistë të invaliditetit, kjo shifër në fund të vitit 2018 ka rënë në 218.000, ose janë regjistruar 34.000 pensionistë të tillë më pak, shkruan gazeta “Sontagsblick”.

Ndërsa gjatë po të njëjtës periudhë është rritur numri i shfrytëzuesve të ndihmave sociale për 41.000 veta, transmeton albinfo.ch.

Ekspertët tërheqin vërejtjen se shumë persona, të cilëve u është hequr pensioni i invaliditetit, herët ose vonë detyrohen të kalojnë në ndihma sociale.

“Gjithnjë më tepër aterrojnë në Entin Social, persona të cilët fillimisht kanë pasur telashe për shkak të gjendjes së tyre shëndetësore”, thonë në Konferencën  Zvicerane të Ndihmave Sociale (SKOS) për gazetën.

Ndërsa në BSV, nga ana tjetër, thonë se fakti se shifrat e rasteve sociale dhe të pensionistëve të invaliditetit po zhvillohen në kahe të kundërta nuk është ndonjë tregues kauzaliteti në mes tyre, përcjell albinfo.ch.

Megjithatë, BSV është duke punuar në një projekt studimor për të zbuluar dëshmi më konkrete për raportet mes pensioneve të invaliditetit dhe ndihmave sociale.

---