Zvicër: Shteti nuk do të ndihmojë ata që udhëtojnë jashtë vendit krye më vete

Fluturimet e kthimit, ose riatdhesimet, të tilla çfarë i pati organizuar federata gjatë kulmit të pandemisë, nuk janë planifikuar më

Të gjithë ata që aktualisht nga Zvicra udhëtojnë jashtë vendit dhe bllokohen në vendin ku shkojnë për shkak të masave të atjeshme për Covid-19, duhet të gjinden vetë rreth kthimit në Zvicër.

Fluturimet e kthimit, ose riatdhesimet, të tilla çfarë i pati organizuar federata gjatë kulmit të pandemisë, nuk janë planifikuar më, shkruan agjencia e lajmeve Keystone-SDA.

Kjo është një lloj “hakmarrjeje” që shteti u rezervon atyre që nuk u binden rekomandimeve për të mos udhëtuar jashtë vendit (kryesisht në Itali) para se të arrihet një vendim zyrtar për lejimin e udhëtimeve të tilla, shkruan albinfo.ch.

Departamenti Zviceran i Punëve të Jashtme, EDA e ka konfirmuar të enjten këtë lajm, të publikuar më parë nga blick.ch.

Kushdo që bën një udhëtim tani duhet të jetë i vetëdijshëm që Zyra Federale e Shëndetit Publik (BAG) dhe EDA vazhdojnë të këshillojnë kundër udhëtimeve jo urgjente jashtë vendit, përcjell albinfo.ch. Përjashtim këtu bëjnë: Gjermania, Franca dhe Austria.

Kriza Covid 19 ende nuk është kapërcyer në shumë rajone dhe vende. po ashtu, nuk mund të përjashtohet edhe shpërthimi i të ashtuquajturave valë të dyta, ka deklaruar më tej një zëdhënëse e EDA.

Të kujtojmë: Zvicra, gjatë muajve mars dhe prill ka riatdhesuar më shumë se 7000 zviceranë dhe të tjerë, që ishin bllokuar në vende të ndryshme të botës.

---