Zvicra e ndihmon Kosovën me 10.2 milionë franga në energjetikë

Qeveria e Zvicrës do t’ia japë një ndihmë Kosovës prej 10.2 milionë euro në sektorin e energjetikës, përkatësisht për përmirësimin e furnizimin me rrymë në rajonin e Gjilanit.

Ministri i Ekonomisë dhe Financave, Ahmet Shala, ministrja e Energjisë dhe Minierave, Justina Shikora-Pula dhe ambasadori zviceran në Prishtinë, Lukas Beglinger, të martën e kanë nënshkruar Memorandumin e Mirëkuptimit të amendamentuar për Projektin e Trafostacionit të Gjilanit ndërmjet Qeverisë së Republikës së Kosovës dhe Qeverisë së Republikës së Zvicrës.

Pas nënshkrimit të këtij memorandumi ministri Shala e falënderoi shtetit dhe popullit zviceran për ndihmën e vazhdueshme për shtetin e Kosovës.

“Ashtu siç ka qenë e planifikuar ne nënshkruam amandamentimin e një marrëveshje që është nënshkruar në vitin 2008 për financimin e projekteve në sektorin e energjisë për zonën e Gjinalit”, tha ministri Shala.

Ndërsa ministrja Shiroka-Pula e ka cilësuar këtë projekt si shumë të rëndësishëm për rajonin e Gjilanit. “Kemi të bëjmë me një projekt shumë të rëndësishëm për rehabilitimin e infrastrukturës në sektorin e energjisë, në ndërtimin e nënstacionit Gjilani 5. Ky nuk është i vetmi projekt që kemi bashkëpunuar me shtetin zviceran, ne kemi edhe shumë projekte  tjera në proces  të cilat mendojmë që në të ardhmen që do t’i realizojmë”.

Ambasadori Beglinger ka thënë se ky projekt është vazhdimësi e përpjekjeve të qeverisë zvicerane për të kontribuar në përmirësimin e  infrastrukturës, por edhe të shërbimeve në fushën e energjisë dhe ujit.

“Për t’u kontribuar këtyre përpjekjeve qeveria zvicerane pret nga akterët e tjerë që edhe ata të marrin pjesë në këto projekte, në mënyrë që të sigurohet që problemi i sektorit të energjisë mos të mbetet problem për Kosovën”, ka thënë ambasadori Beglinger.