Zvicra e teta në botë

Kështu Zvicra vazhdon të mbetet në vendin e tetë në renditjen e përgjithshme të FIFA-s

(KEYSTONE/Jean-Christophe Bott)

Është publikuar renditja më e re nga FIFA për muajin e kaluar, ku në dhjetë vendet e para nuk ka ndryshime, shkruan albinfo.ch.

Kështu Zvicra vazhdon të mbetet në vendin e tetë në renditjen e përgjithshme të FIFA-s.

Kombëtarja Shqiptare ka fituar një pozicion në renditjen e përgjithshme të FIFA-s, edhe pse nuk ka zhvilluar asnjë ndeshje gjatë muajit të fundit sikurse të gjitha përfaqësueset evropiane. Kuqezinjtë ka përfituar nga rënia e Algjerisë në vendin e 60-të, duke u ngjitur në të 59-in.

Edhe Kosova, sikurse Shqipëria ka fituar një pozicion. Një muaj më parë Përfaqësuesja e Kosovës klasifikohej në vendin e 178-të, por rrëshqitja me shtatë vende e Belizes, i ka dhënë mundësinë Kosovës të përmirësojë minimalisht renditjen e saj.

Në vendin e parë është Gjermania, e ndjekur nga Brazili, Portugalia, Argjentina, Belgjika, Spanja, Polonia, Zvicra, Franca dhe Kili.