Zvicra, edhe 9 milionë franga ndihmë Shqipërisë

Ndihma helvetike është konfirmuar gjatë vizitës që ministri shqiptar i Energjetikës, Damian Gjiknuri zhvilloi në Zvicër. Kjo ndihmë shkon kryesisht për projektin TAP

Qeveria e Zvicrës ka ndarë një shumë prej 9 milionë frangash për të mbështetur sektorin energjetik në Shqipëri gjatë periudhës 2014-2018. Prej kësaj shume, 6.6 milion franga do të shpenzohen për manaxhimin e projektit Trans Adriatic Pipeline (TAP) dhe për perspektivën e tregut të gazit në Shqipëri.

Kjo ndihmë helvetike është konfirmuar gjatë vizitës që ministri shqiptar i Energjetikës, Damian Gjiknuri zhvilloi në Zvicër. Ai qëndroi për një vizitë dy ditore në Bernë, me ftesë të homologes Doris Leuthard, ku takoi edhe përfaqësues të lartë të konsorciumit TAP.

Në takim ministri shqiptar, sipas TCH, kërkoi përfshirjen e sipërmarrjeve shqiptare në punimet e infrastrukturës civile në territorin e Shqipërisë, mundësinë e lidhjes së termocentralit të Vlorës me infrastrukturën e gazit, si dhe zyrtarizimin e një pike dalëse shtesë të gazit në territorin e Shqipërisë.

Përfaqësuesit e TAP-it, thuhet se kanë vlerësuar progresin e procedurave në Shqipëri, si vendi i parë ku do të nisin punimet në pranverën e vitit që vjen, për të përfunduar në vitin 2019.

Po ashtu Ministri Gjiknuri zhvilloi takime dhe diskutime edhe me pёrfaqёsuesit e lartё tё kompanisё shtetërore tё prodhimit dhe shpёrndarjes sё energjisё zvicerane AXPO, si dhe bёri njё vizite pune nё Qendrёn e Menaxhimit tё transmetimit dhe tregtimit tё energjisё nё Evropë, tё kёsaj kompanie.

Ndryshe, Zvicra është një nga donatorët më të mëdhenj të Shqipërisë. Që nga viti 1992, Zvicra sipas ministrit Gjiknuri, si donatori i parë nё sektorin e energjisё nё Shqipёri, ka investuar në 22 projekte tё suksesshme.

Ndërsa disa ditë më parë Qeveria zvicerane konkretizoi marrëveshjen me autoritetet shqiptare duke premtuar një investim prej 11 milionë eurosh në përmirësimin e infrastrukturës së ujësjellësve e kanalizimeve.