Zvicër – Maqedoni, strategji e re e bashkëpunimit 2017-2020

Zvicra paraqiti një strategji të re të bashkëpunimit me Maqedoninë në periudhën prej 2017 deri në vitin 2020, ndërsa ambasadorja zvicerane në Shkup, Sybille Suter,  theksoi se vendi i saj mbështet tranzicionin politik, shoqëror dhe ekonomik në Maqedoni që nga viti 1992, dhe strategjia e re synon të vazhdojë këtë mbështetje në katër vjetët e ardhshme përmes një qasje praktike fokusuar në rezultate konkrete.

” Jam e kënaqur që Zvicra mbështet Maqedoninë në 25 vjetët e fundit. Kemi arritur shumë dhe ne jemi të gatshëm që të vazhdojmë të mbështesim Maqedoninë, duke lejuar zhvillimin e institucioneve përgjegjëse, duke krijuar vende pune, përmirësimin e cilësisë së infrastrukturës publike dhe mbrojtjen e mjedisit “, tha ambasadorija e Zvicrës, Sybille Suter.

Strategjia e re e «Swiss Cooperation 2017 – 2020» parashikon financimin e 69 milionë eurove. Objektivi kryesor është të mbështesë Maqedoninë në procesin e reformave dhe në përmbushjen e standardeve evropiane, dhe për të ndërtuar një demokraci sociale gjithëpërfshirëse dhe një ekonomi tregu, duke siguruar menaxhim efikas të burimeve natyrore.

Disa nga rezultatet e pritshme të strategjisë së re janë edhe transparenca më e madhe dhe përgjegjësi e pushtetit lokal, duke krijuar 4,400 vende të reja pune, dhe qasje në menaxhimin e burimeve të ujit  për 115 mijë banorë.