Zvicra kërkon negocim të Lëvizjes së Lirë me BE-në

Negociatat për palën zvicerane ato do t`i udhëheqë Mario Gattiker, i cili, është avancuar nga drejtor në sekretar shtetëror të Zyrës Federale për Migracion

Këshilli Federal i Zvicrës synon të negociojë me BE-në lidhur me mundësitë e jetësimit të marrëveshjes për lëvizje të lirë, në rrethanat e krijuara pas pranimit me referendum të Iniciativës kundër Migracionit Masiv. Qeveria (KF) me këtë rast planifikon të arrijë dy qëllime: Që në të ardhmen të jetë Zvicra ajo që do të drejtojë dhe të kufizojë vetë migracionin nga BE-ja dhe së dyti, të sigurohet edhe rruga bilaterale.

Por, duke qenë se Liria e Lëvizjes është elementi qendror i rrugës bilaterale, në arritjen e saj priten edhe vështirësitë më të mëdha.

Me kumtimin e këtij qëndrimi, Qeveria e Zvicrës ka filluar “lojën”, ndërsa i mbetet BE-së që të “pranojë topin”, shkruan srf.ch. E vërteta është se BE-ja deri më tash i ka hedhur poshtë të gjitha përpjekjet e Zvicrës për negocim të Lëvizjes së Lirë, ndërsa ish komisarja e punëve të jashtme, Ashton qe treguar e gatshme vetëm për diskutimin e çështjeve teknike. “Diskutimet” në fjalorin e diplomatëve janë diçka që obligojnë më pak se negociatat.

Por, qoftë negociatat e qoftë diskutimet, për palën zvicerane ato do t`i udhëheqë Mario Gattiker, i cili pak kohë më parë është avancuar nga drejtor në sekretar shtetëror të Zyrës Federale për Migracion (tashmë sekretariatit për Migracion).