Zvicra në debat për Fondin për Klimën: Investimet miliardëshe në rrezik

Foto Ilustrim

Parlamenti zviceran ka nisur diskutimin mbi iniciativën e propozuar nga Partia Socialdemokrate (SP) dhe Të Gjelbrit, e cila synon krijimin e një Fondi për Klimën. Qëllimi i këtij fondi është financimi i qëndrueshëm i masave për dekarbonizimin e transportit, ndërtesave dhe ekonomisë së vendit.

Por iniciativës po i shtohen pengesat. Partitë e qendrës dhe të djathtës (SVP, FDP, Partia e Qendrës dhe Liberalët e Gjelbër) kanë shprehur kundërshtim të fortë ndaj planit, duke e cilësuar atë të kushtueshëm dhe të paqëndrueshëm për financat publike. Këshilli Federal gjithashtu rekomandon refuzimin e saj.

Çfarë parashikon iniciativa?

Fondi për Klimën do të financohej nga shteti me deri në 7.7 miliardë franga zvicerane në vit, për dekada me radhë.

Propozuesit kërkojnë që fondi të mos i nënshtrohet “rregullit të frenës së borxhit”.

Krahasimi me shpenzimet për mbrojtjen kombëtare po përdoret për të justifikuar madhësinë e fondit.-

Propozimi alternativ: Taksa ndaj ndotësve

Liberalët e Gjelbër kanë paraqitur një kundërpropozim indirekt, i cili nuk bazohet në subvencione, por në vendosjen e taksave për ndotësit, duke synuar që ata që ndotin të paguajnë për pasojat, transmeton albinfo.ch.

Çfarë pritet të ndodhë?

Debati në Këshillin Kombëtar do të vazhdojë të premten.

Shumica parlamentare pritet të refuzojë iniciativën.

Ka gjasa që çështja të përfundojë në një referendum popullor, ku qytetarët do të vendosin përfundimisht.