Zvicra, të lehtësojë punësimin e migrantëve të kualifikuar

në këtë studim theksohet se ndërmarrjet zvicerane që kanë nevojë për këta profesionistë ballafaqohen me pengesa të ndryshme për të shfrytëzuar këtë potencial

Zvicra ka një potencial të pashfrytëzuar të migrantëve të vendeve të treta që kanë sjellë me vete kualifime të larta nga vendi i tyre i prejardhjes. Instituti B.S.S nga Bazeli ka ardhur në një përfundim të tillë në një studim të prezantuar këto ditë. Por, në këtë studim theksohet se ndërmarrjet zvicerane që kanë nevojë për këta profesionistë ballafaqohen me pengesa të ndryshme për të shfrytëzuar këtë potencial.

Studimi është porositur nga Organizata Humanitare e Kishave Evangjeliste të Zvicrës (Heks) dhe kërkon nga Këshilli Federal të thjeshtësojë procedurat për rekrutimin e migrantëve të kualifikuar nga shtetet e treta.

Heks kërkon që këto resurse në të ardhmen të shfrytëzohen më mirë.

Kjo kërkesë ka gjetur mbështetje edhe nga deputetja nacionale e SP-së, Anita Fetz. Ajo thotë se në sesionin veror të Dhomës së Kantoneve do të bëjë një mocion për t`u mundësuar ndërmarrjeve një rekrutim dhe integrim më të lehtë të migrantëve me kualifikime të larta profesionale. Në këtë mënyrë, sipas saj, Zvicra do t`i dilte përballë problemit me mungesën e fuqisë punëtpre profesionale. Fetz ka thënë në konferencën për shtyp të mbajtur me këtë rast në Bernë se Gjermania mund të shërbejë si model në këtë çështje. Atje, ka thënë ajo, ekzistojnë banka të dhënash përmes të cilave bëhet krahasimi i diplomave tüe studimeve të migrantëve me ato të vendësve.

Fetz dhe Heks kanë kërkuar që edhe Zvicra të ngre një bankë të tillë të dhënash, «si ndihmesë për ndërmarrjet, si masë kundër mungesës së fuqisë punëtore të kualifikuar dhe si kontribut për barazinë e shanseve në botën e punës».