Zvicra thotë të jetë personal qëndrimi i Carla del Pontes

Ambasadorja zvicerane në Tiranë, tha se pikëpamjet e shprehura nga Karla del Ponte, në intervistën për Euronews janë personale

Ministri i Punëve të Jashtme i Republikës të Shqipërisë, Edmond Haxhinasto, thirri në një takim ambasadoren e Zvicrës në Tiranë, Ivana Enzler, lidhur me deklarimin e Carla del Pontes, aktualisht ambasadore e Zvicrës në Argjentinë, për raportin e Dick Martyt për trafikimin e organeve në Kosovë, raportojnë mediat në Tiranë.

Ministri Haxhinasto i tha ambasadores Enzler se deklaratat e zonjës del Ponte janë të papranueshme dhe shtrembërojnë realitetin në të cilin janë zhvilluar hetimet në vitin 2003 për akuzat për trafikim të organeve njerëzore, të cilat nuk u vërtetuan asnjëherë.

Në përgjigje, ambasadorja zvicerane siguroi ministrin Haxhinasto se pikëpamjet e shprehura nga del Ponte në intervistën për Euronews janë pikëpamjet e saj personale dhe nuk shprehin aspak qëndrimin apo pikëpamjet e qeverisë së Zvicrës.