Zvicra votoi me 54% kundër mbylljes së centraleve atomike!

Është interesante se në Kantonin Aarau, në të cilin ndodhen tre centrale atomike, votimi kundër braktisjes së energjisë nukleare ka qenë bindës, 63%!

Iniciativa për braktisje të energjisë nukleare ose për mbylljen e centraleve atomike nuk ka arritur të fitojë shumicën në votimin popullor që është mbajtur sot në Zvicër, nivel nacional. Sipas përllogaritjeve të bëra nga Instiuti për hulumtimin e opinionit GFS Bern, 54 për qind të votuesve janë shprehur kundër iniciativës, shkruan srf.ch. Margjinat e gabimeve të mundshme sipas këtij instituti janë +/- 2 për qind.

Por edhe pavarësisht përqindjes së përmendur, iniciativa nuk ka arritur ta fitojë as shumicën e kantoneve, që është po ashtu e nevojshme për të ngadhënjyer një iniciativë nacionale, shkruan albinfo.ch. Të gjitha kantonet gjermanofone përveç dy Bazel-ëve (Basel-Stadt dhe Basellandschaft) e kanë hedhur poshtë atë. Nga ana tjetër kantonet frankofone: Gjeneva, Vaudi, Neuchatel-i dhe Jura kanë votuar në favor. Vetëm kantoni i Freiburgut (me shumicë frankofone) ka votuar ngjashëm me kantonet gjermanofone, me 51% kundër braktisjes së energjisë nukleare.

Është interesante se në Kantonin Aarau, në të cilin janë tre centrale atomike, votimi kundër braktisjes së energjisë nukleare ka qenë bindës, 63%!

Aleanca “Për një braktisje të matur të energjisë atomike” e cila e ka lansuar iniciativën  përbëhet nga më shumë se 40 organizata dhe shoqata, transmeton albinfo.ch. Nga partitë e përfaqësuara në parlament, kjo iniciativë gëzon mbështetjen e Partisë Socialdemokrate (SP/PS), asaj të Gjelbër dhe GLP (Grunliberale). Nga ana tjetër, pjesa më e madhe e spektrit politik të vendit, gjegjësisht partitë e djathta dhe ato të qendrës: SVP/UDC, FDP/PLR, CVP/PDC dhe BDP e hedhin poshtë iniciativën.