Zvicrës i mungojnë vendet për strehim të refugjatëve

Koncepti emergjent i autoriteteve federale për strehimin afatshkurtër të azilkërkuesve duket se ka një defekt. Radioja e ransmetuesit publik SRF me hulumtimet e bëra ka ardhur në përfundim se vetëm gjysma e vendeve të premtuara për strehim në qendrat e mbrojtjes civile (bunkerë, strehimore nëntokësore) janë me të vërtetë në dispozicion për refugjatët.

Ish ministri i mbrojtjes, Ueli Maurer, në vjeshtën e vitit të kaluar kishte folur për ekzistimin e 50 mijë vendeve për strehim. Zyra Federale për Mbrojtjen e Popullatës e ka korigjuar këtë shifër duke e zvogëluar përgjysmë, në 25 mijë, shkruan srf.ch. Arsyeja e mungesës së numrit të premtuar të vendeve për strehim qëndron në faktin se këto strehimore janë shfrytëzuar për destinime të tjera, kryesisht nga shoqatat e ndryshme.

Kantonet druajnë se organet federale në rast emegjence do t`ua marrin vendet e strehimit që janë në dispozicion. Kështu thotë Marcel Suter, kryetar i Bashkësisë së autoriteve kantonale për migracion.