132 milionë më shumë për integrim në tregun e punës

Konfederata dhe kantonet në Zvicër dëshirojnë që sa më shpejt të integrojnë refugjatët dhe azilkërkuesit në tregun e punës, shkruan albinfo.ch.

Për këtë qëllim ata kishin rënë dakord për një “agjendë integruese” të përbashkët, njoftoi Këshilli Federal.

Qëllimi është, për shembull, që të gjithë refugjatët dhe azilkërkuesit e pranuar përkohësisht pas tre vjetësh të kenë mundësi të njohin një gjuhë të vendit. Përveç kësaj, të paktën gjysma e të gjithë personave të rritur duhet të integrohen në tregun e punës pas shtatë vjetësh. “Ne u japim refugjatëve dhe përkohësisht azilkërkuesve të pranuar mundësinë për t’u integruar më shpejt në tregun e punës”, tha Këshilltarja Federale, Simonetta Sommaruga, në një konferencë për media në Bernë.

Për t’i financuar masat mbështetëse, kantonet duhet të marrin një taksë integrimi prej 18,000 frangash zvicerane për person nga Qeveria federale në të ardhmen. Deri më tani, Qeveria federale paguan 6,000 franga për person. Procesi i parashikuar i integrimit kërkon fonde shtesë, tha Këshilli Federal në Bernë.

Në një hap të mëtejshëm, në dy vjetët e ardhshme, qëllimi është shqyrtimi i financimit të strehimit, kujdesit dhe integrimit në sektorin e refugjatëve dhe azilit në tërësi.

 Këshilli Federal pret që procedura të çojë në shpenzime shtesë vjetore prej 132 milionë franga.

Konfederata dhe kantonet gjithashtu kanë rënë dakord për një sistem të ri për të mbuluar shpenzimet e të miturve të pashoqëruar. Konfederata dëshiron t’u japë kantoneve një mbështetje më të fortë në të ardhmen. Subvencionet shtesë për kantonet duhet të jenë rreth 30 milionë franga, sipas Këshillit Federal.