Shqipëri: Rënie e turistëve nga Kosova, rritje e atyre nga Serbia

Sipas të dhënave të publikuara nga Monitor.al, Shqipëria ka pritur rreth 6.58 milionë turistë të huaj gjatë periudhës janar-korrik 2025, me një rritje prej vetëm 3.5%, krahasuar me 23% në të njëjtën periudhë të vitit të kaluar.

Rënia më e madhe vërehet te turistët nga Kosova, që përbëjnë rreth 35% të totalit. Në shtatëmujorin e parë, vizitat e tyre ranë me 5% (121 mijë më pak), ndërsa vetëm në korrik u shënua një ulje prej 6%. Shkaqet lidhen me liberalizimin e vizave për BE-në, rritjen e çmimeve në Shqipëri dhe zhvlerësimin e euros.

Në të kundërt, turistët serbë janë shtuar me 16% në periudhën janar–korrik dhe me 28% vetëm në korrik, duke preferuar kryesisht jugun e vendit.

Ndërkohë, italianët shënuan rritje modeste prej 4.5%, ndërsa vizitat nga Turqia, Polonia dhe Spanja kanë rënë. Përkundrazi, Franca dhe Gjermania kanë regjistruar rritje të fortë me përkatësisht 47% dhe 27%.