Thaçi del para Gjykatës Speciale për aktakuzën e re, thotë se s’përbën rrezik politik për askënd

Ish-presidenti i Kosovës, Hashim Thaçi, është paraqitur në Dhomat e Specializuara të Kosovës në Hagë lidhur me aktakuzën e re që është konfirmuar ndaj tij për pengim të drejtësisë.

Ai nuk u deklarua mbi akuzat e reja, por tha se Kosova është në prag të zgjedhjeve të përgjithshme, por shtoi se ai nuk paraqet “rrezik politik” për askënd.

“Me siguri ju e dini që unë tash e katër vjet përballem me një proces tjetër gjyqësor dhe kemi dëgjuar vlerësime keqinterpretuese të historisë politike dhe kombëtare për lirinë e shtetit dhe pavarësinë e Kosovës më së paku nga viti 1980 deri më sot. Pra, është një proces voluminoz. E di se shoqëria kosovare, familja ime dhe unë presim me padurim fundin e këtij procesi, e presim drejtësinë për çka edhe besojmë në drejtësi. Krejt papritmas para dy ditësh u njoftova për akuzën e re nga ZPS. E di se Kosova është në prag të zgjedhjeve të përgjithshme elektorale, por unë nuk jam pjesë e garës elektorale, nuk paraqes rrezik politik për askënd, prandaj kërkoj edhe sot, unë besoj dhe respektoj Kushtetutën dhe ligjet e Kosovës, kërkoj edhe sot nga të gjithë në këtë sallë që të respektohen Kushtetuta dhe ligjet e Kosovës, sepse Dhomat e Specializuara janë produkt i institucioneve të Republikës së Kosovës”, deklaroi Thaçi.