2 vjet burg për ish boksierin kosovar që ka rrahur policin

Kosovari 29 vjeçar E.B me banim në kantonin Vaud, ish kampion bote në kickbox për amatorë në kategorinë e rëndë ishte i njohur me emrin luftarak “Mister K.O”. Por ai është bërë i njohur në regjion edhe për përleshjet e tij jashtë ringut.

Për një nga këto përleshje ndaj tij është zhvilluar një proces gjyqësor në Lozanë.

Siç shkruan gazeta 20minutes, në dhjetorin e vitit 2011 Mister K.O. e kishte rrahur në një diskotekë një polic (që kishte qenë në kohë të lirë aty). Pasi ia kishte thyer nofullën, ai e kishte goditur gjatë policin me grushte dhe me shqelma edhe pasi që ky i fundit ishte rrëzuar . Sipas dëshmitarëve, bëhet fjalë për një skenë të “dhunës së egër”, ndërsa viktima thotë para gjyqit se edhe tash, katër vite më vonë ka një pllakë metalike në nofull.

Ndërsa E.B. i pyetur nga trupi gjykues ka thënë se polici në fjalë në diskotekë i kishte kërkuar kokainë dhe pastaj e kishte kërcënuar duke ia drejtuar pistoletën  në fytyrë. Kështu, sulmi sipas tij është bërë në vetëmbrojtje, transmeton albinfo.ch. Por trupi gjykues  nuk e ka konsideruar të besueshëm versionin e tij. Sipas tij polici ka qenë me bluzë me mëngë të shkurta dhe nuk ka pasur mundësi të ketë pasur revolver me vete.

Sidoqoftë, E.B., ish boksieri iu cili tash drejton një firmë për transport parash ka kërkuar falje . “Nuk kam dashur ta lëndoja”, ka thënë ai.

Megjithatë, gjyqi i ka shqiptuar kosovarit (të dënuar edhe më parë) me 2 vjet burg, njërin prej të cilëve burg efektiv. Në burg është po ashtu edhe vëllai tij, i cili është tash tre vjet në burg për vrasje.