Komuna e Gjilanit pranon një automjet zjarrfikës nga Kantoni i Cyrihut

Komuna e Gjilanit pajiset me automjet zjarrfikës falë donacionit nga Cyrihu

Komuna e Gjilanit ka pranuar një donacion të rëndësishëm nga Kantoni i Cyrihut, i cili ka dhuruar një automjet modern zjarrfikës për Njësinë Profesionale të Zjarrfikjes dhe Shpëtimit, shkruan albinfo.ch. 

Në ceremoninë e pranimit të këtij donacioni mori pjesë edhe drejtori për Mbrojtje dhe Shpëtim, Enver Shabani, i cili në fjalën e tij përshëndetëse shprehu mirënjohjen për këtë kontribut të çmuar, si në emrin e tij personal, ashtu edhe në emër të kryetarit të Komunës, Alban Hyseni, dhe të gjithë njësisë së zjarrfikësve në Gjilan.

Ai theksoi se donacioni i automjetit zjarrfikës, së bashku me pajisjet përcjellëse, përbën një mbështetje të rëndësishme për rritjen e kapaciteteve operacionale në menaxhimin e emergjencave dhe në mbrojtjen e jetës dhe pronës së qytetarëve.

Sipas tij, ky automjet do të ndikojë drejtpërdrejt në përmirësimin e reagimit të shpejtë dhe efikas në raste zjarri dhe situata të tjera emergjente, duke rritur nivelin e sigurisë në komunë.

Kantoni i Cyrihut i dhuron një automjet zjarrfikës qytetit të Gjilanit

Ky donacion është realizuar falë bashkëpunimit dhe angazhimit të bashkatdhetarëve dhe humanistëve, përkatësisht përfaqësuesve të Shoqatës “17 Shkurti”, Taulant Foniqi dhe Ilijaz Ilijazi, si dhe Driton Tahiri nga Malisheva e Gjilanit, i cili jeton dhe vepron në Zvicër.

Në mënyrë të veçantë, Komuna e Gjilanit shprehu falënderim për përfaqësuesit e institucioneve të Kantonit të Cyrihut, përfshirë Mario Fehr, anëtar i Qeverisë së Kantonit të Cyrihut, Daniel Wäfler, anëtar i Këshillit Kantonal, si dhe Renato Mathys, shef i shërbimit të zjarrfikjes.

Ky donacion vlerësohet si një tjetër dëshmi e bashkëpunimit të suksesshëm ndërmjet Komunës së Gjilanit dhe Kantonit të Cyrihut, duke forcuar lidhjet ndërmjet komuniteteve dhe duke sjellë përfitime konkrete për qytetarët.

Autoritetet komunale u shprehën të bindura se ky bashkëpunim do të vazhdojë edhe në të ardhmen, duke u zgjeruar në fusha të tjera me interes të përbashkët, ndërsa ky kontribut do të mbetet një simbol i miqësisë dhe përkrahjes ndërmjet dy vendeve./Albinfo.ch 

---