20 tonë ndihma për më të varfrit në Kosovë

Destinacioni i fundit i marshutës prej 2100 kilometrash të organizatës humanitare "Familien in Not" është Shtimja

Kryetari i shoqatës «Familien in Not» (Familjet në nevojë) Georg Wingler dhe ndihmësja e tij Doris Schröder janë nisur me 20 tonë ndihma për rrugë të gjatë, ditën e dytë pas Krishtlindjes. Destinacioni i fundit i marshutës së tyre prej 2100 kilometrash është Shtimja, një komunë e vogël në mes të rrugës Prishtinë Prizren.

Ata kanë grumbulluar ndihma të ndryshme nga rrethina e Gütersloch-ut, për t`ua dërguar “më të varfërve në mesin e të varfërve”, shkruan dieglocke.de. Veshmbathje dimri, mobile shtëpiake por edhe dritare, dyer dhe kaloriferë për pajisjen e shtëpive që janë ndërtuar në kuadër të projekteve të shoqatës.

Sigurisht, në kamion kanë zënë vend edhe pakot me dhurata që fëmijët nga kopshtet dhe shkollat e qarkut Gütersloch i kanë dhuruar si befasi të Krishtlindjes për fëmijët që jetojnë në kushte të mjerueshme në fshatra, transmeton albinfo.ch.

Por jo vetëm kaq: Në kuadër të këtij transporti, po dërgohen edhe orendi shkollore dhe material tjetër shkollor për shkollat fillore, profesionale dhe teknike në Kosovë.

Ndarjen e drejtë dhe të lorientuar sipas nevojave do ta bëjnë Georg Winkler dhe Doris Schröder së bashku me organizatat homologe mike në Kosovë.

Pjesë e aksionit, krahas dy të përmendurve ishin edhe Milaim Dugolli, Selami Jashari, Valbone Gash,  Leon dheLudger Bakenfelder.