200 vende të reja të punës në Prishtinë

Kompania “Teleperformance” këtë vit pritet të hapë 200 vende të reja të punës, derisa vitin e ardhshëm ky numër pritet të dyfishohet

Kryetari i Komunës së Prishtinës, Shpend Ahmeti ka thënë se me ndihmën e kompanisë “Teleperformance” do të hapen 200 vende të reja të punës, kurse vitin e ardhshëm ky numër do të jetë dyfish më i madh, raporton albinfo.ch.

“Teleper​f​ormance” e ka kontraktuar klientin e parë, që është “SKY Germany”, që njihet si kompania më e njohur në Gjermani për ofrimin e shërbimeve televizive. “Sivjet do të rekrutohen minimum 200 punëtorë, të cilët duhet të jenë të kualifikuar dhe ta dinë gjuhën gjermane. Kurse, vitin e ardhshëm, minimum edhe 400 punëtorë të tjerë”, është shprehur kryetari Ahmeti.

Ai ka shtuar se “Teleperformance” operon në 72 vende të botës dhe ne po bëhemi vendi i 73-të.

Ndërkohë, drejtori i operatives i kompanisë “Teleperformance Germany”, Michael Ridder është shprehur se Prishtinën e kanë parë si një vend ideal për të investuar.

Interesimi ka filluar menjëherë dhe të interesuarit duhet të paraqiten në kompaninë “HumanPower” e cila do të bëjë rekrutimin e punëtorëve.