4 të vdekur nga stuhia në veri të Evropës

(Owen Humphreys/PA via AP)

Të paktën 4 persona kanë vdekur, pasi Britania e Madhe, Gjermania veriore dhe jugu i Skandinavisë janë goditur nga një stuhi e fuqishme për të tretën ditë me radhë, me erëra të fuqishme, shira të dendur dhe stuhi që shkaktuan përmbytje, ndërprerje të energjisë elektrike, evakuime dhe ndërprerje të fluturimeve, shërbimit hekurudhor dhe linjave të trageteve.

Sipas mediave ndërkombëtare, mekanizmat mbrojtës kundër përmbytjeve nuk arritën të frenonin vërshimin e furishëm të ujrave në Danimarkë dhe Gjermani, teksa në Flensburg, një qytet gjerman në jug të kufirit me Danimarkën, uji shkoi në 2 metra mbi nivelin më të lartë të regjistruar brenda një shekulli.

Energjia elektrike u ndërpre në pjesët e përmbytura të qytetit për arsye sigurie, përcjell albinfo.ch.

Linjat e trageteve dhe shërbimi hekurudhor u pezulluan përkohësisht jo vetëm në zonat gjermane e daneze të prekura nga moti i keq, por edhe në Suedinë jugore.

Ndryshe, Aeroporti i Kopenhagës anuloi 142 fluturime, ndërsa në Skoci parashikohen të bien gjatë ditës plot 100 milimetra shi.