45 aksidente trafiku në 24 orë, një me fatalitet

Raportohet se një person, ngasës i motoçikletës, ka vdekur si pasojë e një aksidenti në fshatin Suhodoll të Graçanicës

Në 24 orët e fundit në vend janë raportuar 45 aksidente trafiku, në mesin e tyre edhe një me fatalitet. 29 nga këto aksidente ishin pa të lënduar, kurse 16 të tjerë me lëndime, njofton policia në raportin e fundit.

Gjithashtu raportohet se një person ka vdekur si pasojë e një aksidenti në fshatin Suhodoll të Graçanicës.

Policia e Kosovës raporton se viktima, gjersa ka qenë duke lëvizur me motoçikletë me katër rrota, është rrokullisur, ku si pasojë drejtuesi dhe pasagjeri i mitur kanë pësuar lëndime trupore dhe janë transportuar në QKUK.
Drejtuesi i motoçikletës mbrëmë rreth orës 22:35 ka ndërruar jetë, ndërsa pasagjeri është liruar në shtëpi. Gjithashtu Policia e Kosovës ka shqiptuar 963 tiketa trafiku në 24 orët e kaluara, thuhet në raportin e policisë.