50 mijë anulime në ditë për pushime në Greqi

Mediat greke  mëngjesin e të enjtes i përshkruajnë si “dramatike” pasojat për ekonominë pas kufizimit të tërheqjes të parave nga frika e falimentimit të shtetit helen.

Shoqata e kompanive turistike të Greqisë thanë se prej të hënës vijnë çdo ditë 50 mijë anulime të rezervimeve për pushime.

Për shkak se bëhet fjalë për prenotim “last minute” që  kushtoi 20 për qind të totalit të rezervimeve vjetore, kjo është një goditje e madhe për turizmin në Greqi, transmetojnë mediat greke.

Shoqata e eksportuesve grek vlerëson se humbja e tyre nga ana tjetër është 80 milionë euro në javë ndërsa javën e ardhshme eksportet do të bien me shtatë për qind dhe importet me 28 për qind.

Nga mëngjesi i sotëm pensionistët po presin radhë të gjata para 1,000 filialeve të bankave,  ku mund të tërheqin 120 euro nga pensionet e tyre  që nuk u janë paguar siç duhet që nga qershori.